للأسف في تونس 🇹🇳 وصل الاحتياج الى هذه الدرجة

شفت بعيني وقدامي مرا مع ولدها في حدود 5 سنوات خارجين من السبيطار وصلوا قدام حانوت لملاوي قالها : جعت ماما وشاهي كعبة ملاوي  بالصالامي..

وقفت بيه قدام الحانوت تسئل على سوم كعبة ملاوي وتحسب في فلوسها أو طرف الصرف إلي عندها ..

قتلوا ملاوي فيها هريسة صالامي بركة بقداش. 

قلها 1800 ملم ..

شافت فلوسها ما يوصلوش وولدها يطل على الملاوي ولاصق في الكونتوار..(جيعان)

قتلوا : ملاوي وهريسة بركة ..

قالها : 1200 ملم.

قَتلوا كعبة ملاوي شايحة بقداش ..قالها 900 ملم.

قَتلوا أعطيني زوز ملاوي شايحين..(فهمت إلي هيا زادة تحب تاكل باش ما نقولش حاجة أخرى توجع)

ولدها قعد يغزر وعينو بالدموع..

أنا ديجا تسقمت ما عادش منجم ناكل وقعدت مركز مع الناس  كيفاش ولات تعاني في أبسط شي حتى في كعبة ملاوي ...

ناديت الولد قتلوا ايجا ..تبسم وشد في أمو يمرج فيها من دبشها على الصالامي...

صحيح تلزيت نكلم المرا  بطريقة مباشرة وبصوت منخفض وبكل جديّة قلتلها احسبني خوك وما تحشمش أنا باش نخلص عليك وعلى ولدك ..ما تقولش انسان غريب احسبني خوك ..

الأم ترددت باش تاخذ من عندي (إلي كانت محترمة هيا وولدها وموش متع طلبة) أما أنا ما خليتلهاش فرصة باش ترفض .. وبسرعة غادرت تفاديا لإحراجها وهارب من الوجيعة في نفس الوقت...

أنا نحكي موش تسجيل بطولات وإنسانية وباش نعمل فيها تقوى ورياء فارغ ربي يُجيرنا...خاتر الكلها حكايات فارغة وربي يعلم بالسرائر..  أما بالحق مشهد خلاني مريض ولتوة ما خرجش من مخي وبرشة ناس ولات تعاني أكثر ملي نحن نتصوروا.